鬼妹仔「迷湯」最近同功夫小子「銀仔」傳緋聞兼俾人話同居，雖然佢哋兩個口口聲聲話冇咁嘅事，不過睇見佢哋一講到呢段緋聞冧到痹嘅樣，你話冇嘢就真係冇人信啦！
一向擅長演狐狸精嘅迷湯，佢對眼真係識放電，所以演呢類角色入型入格，關仁聽聞佢私下都好鍾意向啲男同事放生電，只要佢發嗲功，包保嗲到你暈。
秘密地方約會
據知當紅小生「蜜蜂仔」都曾經中招，佢哋兩個可以話係姣婆遇上脂粉客，一撻即着，嗰陣佢哋頻頻偷偷約會，但因蜜蜂仔話晒係偶像派，所以佢哋約會要揀啲好秘密嘅地方，咁先可以成功避開狗仔隊嘅耳目。不過迷湯同蜜蜂仔兩個都係抱住玩玩吓嘅心態，所以玩完一輪，佢哋就各散東西，完全當冇事發生過咁！
Textby關仁
