日本動畫大師宮崎駿嘅新作《崖上的Ponyo》噚日喺日本正式開畫，由於今次係佢老人家繼《哈爾移動城堡》後相隔4年推出嘅新作，所以各間戲院都出現人龍，場面墟冚。有份配音嘅日劇《悠長假期》女星山口智子同《女王的教室》女主角天海祐希，當然畀足面陪同宮崎駿一齊現身戲院造勢。山口話片中嘅小金魚成日想見男主角，自己都有呢種女仔嘅本性，宮崎駿就話想再揸筆所以炮製咗今次嘅新作。