於娛樂圈立足，定位可以有好多種，林海峰的那一種就仿似只他獨有。大家都講笑話，講明亂噏都特別多人聽；大家都開演唱會，講明求其唱開完又開都特別多人睇；大家都賣紀念品，講明為搶錢都特別多人送錢畀佢使。一種前無古人，暫時後無來者的吸引力，阿Jan靠把口仲有一身潮人形象，愛穿Nike又愛VISVIM，留意他打扮就知他其實絕不求其。今次跟：CHOCOOLATE合作將林兔翻叮，超大碼瓷杯包裝Tee製作認真，唔求其的叫座力……相信就只會更受歡迎。
記者：許維雅
攝影：梁細權
買Tee送杯
今次Crossover以林兔配上30METHING字樣，設計出兩個圖案款式，每款兩色，以金銀黑白粉藍5色交替配襯，推出4款Tee及兩款Cap。每件Tee更會以1隻加大碼林兔圖案瓷杯作包裝，得意又實用，女孩子對件Tee冇興趣都一定想帶隻杯返屋企。你笑我計婆仔數都係咁話，之前睇演唱會時已經買咗件林兔Tee，都要$380，今次Tee連杯都係$369，所以一定買嚟填倉抵番條數。為配合今次林兔企劃，又一城：CHOCOOLATE專門店將會變期間限定主題店，各位林兔迷切勿錯過。
：CHOCOOLATE×JanLamb系列將於7月21日上架
繼續求其是但噏：「想出寧波車？」
林海峰（林）
蘋果（蘋）
蘋：於《是但噏求其大合唱Part2》已經推出過林兔紀念品，選擇再跟
：CHOCOOLATE合作推出林兔產品，感覺有何分別？
林：其實嚟我演唱會買紀念品嘅都係一向支持我嘅一群人，同
：CHOCOOLATE合作可以接觸更廣層面，冇嚟睇演唱會又鍾意林兔嘅都可以買到林兔產品。總括嚟講，大家嘅合作係愉快嘅。
蘋：今次合作企劃嘅最後完成產品同你最初構思嘅係咪一樣？
林：其實我開頭係想……唔出嘅，之但係同Wallace
（：CHOCOOLATE設計師）本身又有啲私情，所以就出咗囉。（Wallace在旁苦笑）同Wallace同一條村大，識咗好多年，好信得過佢。今次合作大家都開咗好多次會傾咗好耐，一直想出一樣耐用嘅產品，至少唔會用一年半載就丟，每次見到又會記得今次演唱會，最後就決定出呢隻大杯PackingTee。隻大杯幾好吖，可以當湯碗亦可以當筆筒，夠實用。
蘋：除咗呢隻大杯，其實仲有啲咩想出？
林：出車吖。（出車？出咩車？）係，出寧波車。主要因為i.t老闆沈生嘅太太對寧波車特別鍾情，所以想配合番佢咁囉。（……?!）其實有好多嘢都想出，開頭構思整個計劃時，都有好多主意，但人哋做生意㗎嘛，冇理由同人倒米。
蘋：刻意揀林兔翻叮，因為你最滿意呢個Logo？
林：我覺得佢幾得意，同以前啲Logo有啲唔同，感覺女仔啲，但就唔可以話係最滿意。我份人係咁，無論做Show定係出Products，度橋、構思同設計嗰陣已經覺得夠晒好，但每次之後再睇番成件事，總係覺得未夠好，永遠覺得可以做得再好啲。
蘋：每次搞Show都有一個Logo作為標記，你又點睇呢一堆Logo呢？有冇邊個最唔鍾意呢？
林：最唔鍾意呀……我估哈哈笑啦，不過冇哈哈笑又唔會有林兔，所以好矛盾。（因為Part2，所以加了一個代表2的V字手勢於哈哈笑之上變成林兔。）林狗，你會覺得佢兇神惡煞；林兔，你會覺得佢好可愛。哈哈笑好似冇乜性格咁。我覺得一個好嘅Logo好緊要，線條要簡單，一Punch就會想到個牌子。好似一剔，你會即刻諗起Nike；三間，你會即刻諗起adidas。我暫時覺得未有一個可以完全代表自己嘅Logo。
蘋：每次出紀念品都係一啲好簡單嘅Product，其實有冇興趣設計時裝？
林：細個年少氣盛嘅時候，都有設計過男裝，結果當然……吓……明㗎啦！其實我覺得設計時裝或者要同大牌子Crossover，當中要花好多精神、時間同心機，有好多斟茶遞水嘅功夫，我暫時未有咁多時間，更加唔想出師無名，冇Show但忽然出堆嘢出嚟。講到設計玩材料方面，我哋今次開會都有研究過想用啲特別嘅原料，不過都係嗰句啦，人哋做生意嘅，嘗試提到用呢隻料嗰隻料，『嘩！好貴喎，成本方面……』得，我明嘅，人哋都要賺錢㗎嘛！
其他上架新貨：
以簡約男裝為主導品牌方向的：CHOCOOLATE，今季刻意為成熟男士添了些少鮮艷色彩，如夠晒姣的桃紅色PoloShirt，自問Handle到的，絕對係今個夏天的BestPick。其次則有校園味濃的字樣圓領PrintTee，顏色同樣藍藍綠綠，男生一樣彩得起。
查詢：
：CHOCOOLATE（22657521）
九龍塘又一城103號鋪