蟬鳴如雷，告訴我盛夏終於來臨！藍天白雲，決定約埋三五知己，租架快艇出海，大玩水上活動去！西貢海面上，一架快艇扯住水上飛毯、梳化、垃圾桶、電單車，享受被拖行的快感，唔理坐住被扯、趴住被扯，總之今個夏天再熱都唔會扯火，皆因扯水也！
記者：馮冠芝
攝影：王文忠
Model:Kiki、Donna、Color、Alison、Katrina、阿B@StarFantasy
疏肝梳化
未玩至激水上飛毯前，艇家阿添建議我們試玩較溫和的水上梳化熱身。踏上水上梳化，如大型水床，升起的枕位讓人可躺可坐，4人同坐較易平衝，坐住玩無咁拋，邊被拖行，邊享受海風，還有餘閒聊天！疏肝得很，阿添，算你無點我！
水上梳化：
落水度：★★
刺激度：★★★
濕身飛毯
細個睇阿拉丁卡通，見佢悠悠閒坐在飛毯上翱翔天際，所以聽見租遊艇有得玩水上飛毯，兒時憧憬湧現，率先坐上毯。「水上飛毯係趴喺度玩㗎！」果然童話就係用來呃細路！上到飛毯就知味道！迎面水花教人睜不開眼，高速滑行，似玩黑夜過山車！夠臂力拚命握着扶手，掟一個彎，半個身被拋出毯外，飛毯拋至小半空，終於失手，毯反人跌！頓變落湯雞，阿拉丁的瀟灑，原來只係神話！
水上飛毯：
落水度：★★★囗
刺激度：★★★★
華Dee單車
水上電單車，其實唔算新啦？但能長期吸引一眾年輕人，原因簡單，一個字：型！且看唔識游水的Alison（後）在電單車上的英姿！上「車」不夠兩分鐘，二人已自然懂得搖擺身體作平衡，原來飄移唔一定要喺山路上，水上電單車教兩位少女化身天若有情華Dee與頭文字D拓海，我正想舉起拇指稱讚，誰知一個大急彎，都係要落水。由於電單車車身輕，落水度勁高！Go！華Dee！
水上電單車：
落水度：★★★★
刺激度：★★★★
垃圾桶水面行
最後一Round，一於搏到盡，要阿添讓我們試最激玩意！「最激？水上垃圾桶啦！」一看，水上垃圾桶乃是個鐘狀吹氣背心，只要笠上去，拿着快艇放下的手柄，快艇起行，濺起水花，首當其衝先飲海水！「將個頭縮喺背心度！扯行先露個頭出嚟呀！」阿添教路，果然，先做縮頭烏龜至速度夠快先露番個頭出來，就可以靠背心在水面上滑行，享受超人在空中飛翔感！試玩者阿B上水即話：「個頭有啲痛，而另一個頭都……」呃，小記身為女兒身，不解男人最痛，只能以親身經歷話畀大家知，女仔玩絕無問題，夠Pop又唔怕飲鹹水者，必試！
水上垃圾桶：
落水度：★★★★★
刺激度：★★★★★
租遊艇價目：
最少人數：20位
時間：由早上九點至下午五點（日間8小時）
價錢：平日$4,000、周末$8,000起，超過20人者多出人數每位收$100，租遊艇可提供3種水上活動，遊艇上另設卡拉OK、麻雀等。
＊每人另加$150，可延長至晚上夜釣墨魚。
＊須於出發前一星期預約。
＊價格因應供求、假期而浮動。
租快艇價目：
只租快艇亦能玩3種水上活動，$3,000租快艇5小時
查詢：97131595（阿添）、90404871（阿財）、93267219（吳小姐）
網址： http://www.waketim.com