百變座椅Show

等到Fans頸長嘅日本人氣MPVNoah，行貨終於聽日登場！最大賣點係設計夠貼心，唔玩豪華花巧，由外到內實用行先，明刀明槍討好一家老幼。座椅靈活百變照顧周到，儲物空間夠多夠心思，加埋慳油環保，處處凸顯家庭車本色，可以話係豐田MPV陣營中最實幹嘅一員。

記者：黎頌詩
攝影：王文忠
Model：Ariya、Haydn、Renault

無限創意空間

毫無疑問，百變座椅係Noah一大賣點，針對小孩上落嘅扶手，可以固定角度、方便照顧老人及嬰兒的中排旋轉椅，一拉便彈起令尾廂空間得以擴闊嘅後排……你不得不佩服設計者嘅細密心思。Noah這超巨型方匣子內櫳一樣呈方形，第三排嘅乘客嘅壓迫感完全消失，加上一直伸延至車尾嘅大車窗及豪華版專有嘅雙天窗，坐喺車上任何角落，都有同等嘅舒服待遇。
電動雙趟門係另一個好用設備。影相當日，玩到好開心嘅Haydn可愛咁話：「我要搵道門夾住你！」嚇親？唔使，因為呢度聰明趟門遇到障礙會即時回彈，唔會夾到大家嘅小寶寶之餘，當然都夾唔到我啦！

■駕駛艙鋪排頗時尚，桃木紋皮軚環及排檔桿又加了點高貴感。

■運貨實力有幾強？擺架單車綽綽有餘。

實幹本色

做乘客夠晒嘆，對一家之主、即係開車嗰個就似乎有啲不足；駕駛席不算闊落，大隻佬會覺逼，不過操控性加番分。Noah長達4,290mm，同貨Van有得揮，初次駕馭多少有點壓力。好彩有無段變速波箱加VSC行車穩定系統、TRC循迹控制系統，三劍合璧，行車走彎都保持暢順穩定。車身大睇位難？放心，後泊鏡加右側下視同左車頭角位鏡，萬無一失！基於Noah實幹本色，外表及性能絕對實而不華；143匹，日常用唔會叫你失望，當然唔好指望佢爆住飛。外觀亦全無多餘粉飾，簡潔取勝！兩個字概括Noah強項：好用！