Mercedes-BenzSLK55AMG身形小巧，不過就一向以夠辣聞名，開埋篷，推住背和風對抗嘅快感夠晒另類。08Facelifted新版登場，改用黑色點綴外觀，擺明想加辣。不過引擎不變，只係傳動反應更敏捷。虛有其表？咁又唔係，SLK55AMG首次配上幾何轉向系統，一般車速時唔會發功，踩行油，系統啓動，F1軚感即時畀到你。開篷F1？我都想飆……
記者：黎頌詩
攝影：楊錦文
Model：Kiko
鳴謝：淺水灣影灣園
黑色扮Cool
從來Facelifted，好多時都係整色整水，靚咗？醜咗？見仁見智。咁又證明咗Facelifted唔少得，不時有新鮮感之餘，又吸引多啲唔同審美眼光嘅人。SLK55AMG今次小變臉，跑味大增？又唔覺，不過肯定：型咗！原因係，個人睇法：黑色最Cool。今次Facelifted主要玩轉色，扮Cool點主要喺車頭，黑色呈箭頭形嘅頭唇充滿攻擊性，轉成啞黑色嘅頭燈組更加係焦點所在，最戲劇性嘅係胎軨竟然嚟招峯迴路轉，換上帶點高雅古典味嘅多輻式設計。車頭兩側的入風口換上新款式，再望上啲，側面指揮燈都搶過人，原來換上咗同新SL63AMG同款嘅箭頭形新設計。內櫳雖然整體上忠於原作，不過睇真設備原來升咗級，原本屬Option嘅Airscraf，成為原裝配備，音響亦有插SD卡功能，而最搶收視嘅，係換上咗有金屬裝飾嘅型仔軚環，今次小改都算無欺場。
駕馭猛獸
今次Facelifted版嘅主打，其實唔係用眼睇，而係要用手去Feel，因為SLK55AMG首次配上咗幾何轉向系統。一般嘅民用車，扭軚跟車輪轉向嘅角度會有偏差，跟F1賽車嘅1:1大有差別，而呢套幾何轉向系統，就大大提高轉向觸覺。不過佢喺一般行車情況下不會發功，隨住車速提升，轉向偏差便會遞減，逐漸向F1軚感睇齊。即係話，越飆越顯功架。再加埋7G-Tronic轉檔系統經調校後轉檔動作更顯敏捷。車嘅馬力並無提升，一樣係原有嘅5.5公升V8引擎，不過呢360匹、0至100公里加速只需4.9秒嘅威力絕唔能夠小覷。偏硬嘅桶椅同避震，一開車已經展示辣跑本色，稍踏油門，即時推背，強大嘅力量感誘惑你繼續踩油，越加速，掟彎越過癮。不過猛獸喺呢個時候會變得更野性，要漂亮地駕馭，又多了點挑戰性！
a.內櫳鋪排基本不變，軚環則換上AMG新款式。
b.話明扮車手，提升操控感嘅加減波撥片又點少得。
c.沿用上一代嘅5.5公升V8引擎，保留猛獸威力。
d.銀黑配搭嘅中控台，跟全車格調極統一。
e.座椅是偏硬且包圍感十足的桶式設計，08版有埋Airscraf。
規格
引擎：5,439c.c.V8
馬力：360hp/5,750rpm
扭力：265kW/4,000rpm
傳動：SPEEDSHIFT7G-Tronic
查詢：仁孚行（28957288）
