港股經過星期初大跌之後，昨日重見雨後陽光，出現升市，但嘉賓指美股反彈都只是因為油價下跌，但在美國經濟依然未有好轉之下，恒指將有機會下試3月18日的低位。
于：瑞士銀行執行董事 于正人
郭：敦沛金融投資研究部主管 郭家耀
楊：主持 楊慧玲
楊：今日（即昨日）大市回升，究竟係市況轉勢，定係仲要睇淡後市？
郭：我就依然睇淡後市，由於美股反彈只係因為油價下跌令通脹憂慮有所放緩而造成，但美國樓市始終都係好弱，我估計其他經濟環節都依然會繼續偏弱，加上嚟緊美國投資銀行都會繼續公佈業績，因此我覺得港股仲未見底，初步可能要下試3月18日嘅低位。
于：近期傳出好多壞消息，投資銀行成交亦都少咗好多，加上美國次按問題都未能解決，所以未來指數走勢我都睇得比較淡。
搶先貼股：國壽若遇跌市可增持
楊太：我05年用5.2蚊買咗中國人壽（2628），上年年尾沽咗一半，我應該揸埋落去定套現好呢？
郭：國壽嚟緊最大困擾係A股表現，不過佢已經分散投資去基建股同鐵路項目，所以我唔擔心佢會長期受A股影響，加上A股唔會長期咁跌。既然你都喺高位沽咗一半，無理由𠵱家跌咗咁多先套現，甚至如果一日跌一千幾百點仲可以增持國壽。
EMAIL解答：合景換馬SOHO中國
有牌學神：我喺4.67蚊買咗合景泰富（1813），想睇吓前景如何。
郭：宏觀環境就唔係太理想，好多負債高嘅房地產公司，佢哋持有土地儲備比較多，唯一可做就係削價賣樓。如果想博內房股見底回升，穩陣可揀多現金嘅公司，例如SOHO中國（410）。雖然佢股價反彈唔多，但佢低位都企得幾穩，所以要揀都揀啲財政實力強嘅內房股博反彈。
收市後4:30pm
click入 http://finance.appledaily.com以webcam參與節目及收看
歡迎phonein28698262暢談心得亦可email至mailto:[email protected]搶先貼股
