「老闆大晒！」呢句說話幾時都咁啱聽，老細唔畀機會、唔肯出錢，會直接影響球會嘅組軍情況。最近韋斯咸要面臨星散問題已經夠煩，點知諗住飛去美國友賽美職聯明星隊又搞出大頭佛，航空公司竟然出錯，要班球員分兩班機出發，「鎚仔幫」真係黑過墨斗！
韋咸呢個周末要同美職聯明星隊踢表演賽，聽講對手有碧咸壓陣㖭！唔知韋咸係咪太窮，戲金得50萬鎊都要飛過美國搵錢。不過，原本美職聯嗰邊安排咗佢哋搭商務機位嘅，點知航空公司出現問題，結果要韋咸坐經濟位都不特止，仲要球員分兩班機飛去芝加哥，搞到冇晒心機比賽喎。50萬鎊就可以耍到韋咸氹氹轉，你哋話吖，有個有錢老細幾緊要呀！
斷咗大水喉將演逃亡潮
嗰邊家族式嘅阿仙奴，資金有限下被迫每季要賣好球員；呢邊同處倫敦嘅韋斯咸，原本有冰島有米老細麥紐臣射住，家陣佢走佬之後，「鎚仔幫」大逃亡一劇將不斷上演！
韋斯咸之前有麥紐臣注資，當時要風得風，要雨得雨；話之你泰維斯、馬斯真蘭奴、龍格保、尼爾等人周薪有幾貴，全部冇問題準時出糧。不過，當麥紐臣帶埋資金離開之後，韋斯咸要面對嘅問題將接踵而來。
話賣尼爾龍格保套現
首先，日前森莫亞同彭素爾齊齊過檔富咸「跳船」，係韋斯咸散貨套現嘅第一步。森莫亞轉會之後忍唔住爆料，暗示前球會財政狀況好唔掂，高薪嘅球員要減人工，有市值嘅球星就陸續要變賣。其中周薪過5萬鎊嘅隊長尼爾同龍格保，就最大機會離隊喎！
唉，總之都係嗰句，老細要玩死班球員，真係等同捽死隻蟻咁易，拍拍屁股攞晒啲資金走人，成間球會即時宣佈玩完。所以話，突然有老細注資未必係好事，韋斯咸就係最佳人辦。