七月十五日，與馬主Ｎ一齊去參加奧運馬術誓師大會，一入到會展新翼三○一室，就畀一位有型男士叫住，問認唔認得佢，呢位男士身穿藍色Ｔ恤有奧馬標誌，留咗條馬尾，有兩撇鬚，好型噃，唔多認得，但係睇真十幾秒，原來係一位陸羽茶友！佢話：「我𠵱家為奧馬做義工，與千幾位義工同僚為香港辦奧運馬術盡最大努力。」呢位義工Ｂ精通兩文三語，應是義工人辦，果然稍後宣佈，義工Ｂ係全體義工代表，上台與曾局長等等一齊誓師。
見完義工Ｂ，又見到公關Ｐ，乜唔係已經移民LA嘅咩，點解會在會展出現？公關Ｐ話：「趁暑假，仔女唔使返學，我飛返嚟做奧馬臨時義工呀。」連機票都自掏腰包，認真難得，香港好多有心人為辦好奧馬而努力，寫之不盡。公關Ｐ本係市場推廣與公關高手，做過幾間大公司，因子女到LA讀大學與小學，佢特登搬過去住，照顧仔女，中國人媽咪，往往為子女教育而犧牲自己事業，公關Ｐ係其中一位。問公關Ｐ：「仔女讀書情況如何？」公關Ｐ話：「細仔讀Grade8，公立學校，費用全免，比以前讀沙田書院（ShaTinJunior）慳番好多錢。大女考入咗Occidental……」左丁山搶住講：「咦，與奧巴馬做校友噃，叻女啫！」公關Ｐ瞪左丁山一眼：「咁都知，我講咗十次畀香港朋友聽，個個都問我嗰間學校係乜東東！」
誓師大會儀式開始，曾德成局長，霍震霆主席上台致詞，循規蹈矩，照稿宣讀，並無差錯。輪到馬術公司行政總裁林煥光致詞，佢就一貫作風，手上無貓紙，隨意發揮中見到佢一早有準備，講得輕鬆自如，真係醒，如此人物，到馬術公司結束之後，理應係問責局長人選，如果有空缺嘅話！馬時亨局長辭職，遲多半年至九個月得唔得呢？做官最忌不逢時，可嘆也！儀式舉行之後，全港首播金培達為奧馬所作嘅新歌，由陳慧琳主唱，果然好聽，應該起碼流行到九月殘奧完成之後。電台總裁Ｂ姐聽完後話首歌有條件成為流行曲，為奧馬為電台，佢話會全力播放，協助營造奧運氣氛！