奧運殺到埋身，小藍都想換番部高清電視或者係投影機，但係買高清（720p解像度），定係全高清（1080p解像度），𠵱家仲係十五、十六。
亞洲高清協會幹事李柏權（Alan）話，數碼廣播雖然推出咗大半年，都係好少家庭買數碼廣播接收器，好在下月就係奧運，巿面多咗內置數碼廣播接收器嘅電視機（iDTV）。
萬元可買二線牌子
Alan話，如果唔介意買二線牌子嘅話，可以諗吓買全高清iDTV電視機，40吋都係一萬蚊，當中韓國同台灣嘅牌子質素最好，內地嘅就差啲。如果想買一線品牌嘅全高清iDTV就可以等多陣，「一線嘅全高清iDTV𠵱家唔多，40吋賣三萬幾蚊，但年尾會有多啲一線日本品牌iDTV，價錢唔使三萬蚊。」
如果想買投影機睇奧運，一般消費者可考慮買高清，呢輪售價比全高清低得多，短短半年由11,800蚊，跌到一萬蚊。講到牌子首選係樂聲牌，操作容易，原廠顏色設定好，唔使左校右校，保養有3年，啱晒新手玩。
小藍啱啱收到料，Samsung出咗全高清iDTVCrystalDesign系列，個樣好靚仔，鋼琴黑漆機面泛紅酒色調，但價錢仲未定。
逢周五刊出