主持埋噚日最後一次特首答問大會，立法會主席范太終於功成身退，專心做人大常委。范太透露早前主持大會時瞌眼瞓，仲俾議員發現，可見體力上對議會工作不勝負荷，應快快退位讓賢。范太稱9月中會設立新網頁，市民可上網搵佢幫忙，佢更笑言日後只會做「縮頭烏龜」，唔會隨便發言，一定唔會好似曾憲梓咁成日有出位言論。
月前煲呔到立法會就副局長風波解畫時，個咪高峯突然失靈，要勞動特首動手調校，范太話當日場面幾尷尬，爆料指當日係PCCW電盈工作人員話可以搞掂個咪高峯，范太信佢，點知都係唔得。煲呔為人小器，為免有人誤以為有人玩嘢，范太好均真咁去信PCCW投訴，副本呈送特首辦，說明係儀器故障。