阿里巴巴（1688）主席馬雲獲得日本企業家大獎，據《中金線上》引述，日本媒體透露，馬雲將會獲頒發日本第10屆企業家大獎。據講呢個獎過去只會頒畀日本國內企業家，鮮有頒畀外國人，而馬雲亦將會係10年以來首個獲獎嘅國外企業家。
呢個日本企業家大獎由株式會社企業家網絡創辦，每年會選出特別優秀嘅中小企業經營者，評選標準主要根據公司業績、未來增長、社會貢獻，同埋睇吓有冇激勵日本嘅年輕人。
評審委員會揀馬雲，原因係阿里巴巴喺大陸取得壓倒性市場佔有率，兼且能夠將市場開拓到海外。華華諗，好在評審委員會唔係根據阿里巴巴嘅股價嚟評分，否則馬雲會失好多分。阿里巴巴由舊年11月上市至今，股價跌31%，若以佢39.95蚊嘅歷史高位計算，跌幅更達77%。