今年大陸股市比香港股市跌得仲勁，年初至今插水近五成，搞到內地股票行同基金公司都要勒緊褲頭做人。據《新華網》報道，股市大跌，令股票行收入大減，員工花紅由舊年過萬元，縮至家陣有千元人仔都已經算唔錯，而基金公司亦削減出差交通使費，減少不必要嘅開支。
舊年市況好景，基金銷售閒閒哋都幾百億銀人仔，但𠵱家跌到得番幾億，好多基金公司都勁縮皮，有基金公司嘅部門負責人講，以前出差都係搭飛機，但𠵱家公司嚴格控制交通費，上年攞住收據就可以報銷交通費，今年就嚴咗好多，員工只能慳得就慳「能坐火車不讓坐飛機」。
咁搞法，最受害莫過於航空公司，唔單止受高油價之苦，連商務客人都少咗。報道仲提到，股票行同基金公司嘅員工，舊年人工平均都有10%加幅，但今年公司收入減少，人工水平跌咗三成。