暑假期間，名人媽媽又忙於安排子女出國體驗，范姜一家五口陪鍾鎮濤到新加坡開騷，吃喝玩樂，更先減肥後出發；琦琦就帶女兒返祖家探親及到法國朝聖，感謝上天恩賜。
中環名人嘆茶熱點CafeLandmark，前晚裝修後重開，一班明星闊太常客如狄波拉、范姜、何超瓊、余安安、梁家駒夫人及女兒梁慧妍等都有捧場，何鴻燊四姨太梁安琪，繼帶三姨太陳婉珍長女何超雲去巴黎睇Dior騷後，前晚又與超雲一同出席。
指嘉晴唔親章小蕙
名人家長都計劃暑假外遊，范姜就拖男帶女去新加坡，陪鍾鎮濤開演唱會，她說：「一家五口，同埋我啲家人、溫拿嘅叔叔伯伯去食嘢。我哋全家為呢個trip減肥咗十日，因為之前過年肥咗好多，我重咗10磅。」
范姜又揚言現時養育三個子女，十分重負擔，她說：「BonBon（長子嘉浚）係佢媽咪（章小蕙）畀生活費，但返香港時爹哋都會畀零用，佢都讀大學，二女又升國際學校，細女讀K2，好重負擔，三個夠晒數。」問到二女嘉晴可有掛住母親章小蕙？范姜說：「冇，可能佢嗰時好細，兩、三歲就由我湊，唔多記得，冇咁親。」
琦琦則帶女兒Ella去法國路德（Lourdes）朝聖、英倫巡視餐廳業務，及到維也納探父親，她說：「我一家都係天主教徒，去感恩多謝上天畀我咁多嘢，囡囡就第一次去探爺爺。」
稱朱茵非10月結婚
此外，同場慧妍成員如陳法蓉、吳婉芳和王愛倫等都有出席，陳法蓉代好姊妹朱茵否認10月結婚，她說：「朱茵同我講我係佢一生中最好嘅女朋友，你問我，我話你知唔係10月囉，佢哋𠵱家都係好似平時一樣。」有報道指朱茵男友黃貫中（Paul）窮，她說：「好無奈，有錢冇錢好難定，Paul好有才華、理想同正義感。」
對於舊愛許晉亨早前與李嘉欣外遊時，被拍下在露台穿着底褲的照片，陳法蓉即說：「冇特別留意，每個人都開開心心就OK，影到咁性感就要小心啲。」
採訪：LawWaiMan 攝影：RickyIp
話你知：首設酒吧
CafeLandmark前晚裝修後重開，該餐廳屬美心集團旗下，位處中環置地廣場一樓，開放式大露台設計，置地名店盡收眼底，景觀一流，地點就腳，成為闊太明星shopping後嘆茶聚會首選。不過，同樣因為環境太open，所以也成為中環熱門的偷拍場地，白雪仙、謝賢、狄波拉、四姨太梁安琪和關之琳等都被偷影過嘆茶。
據美心太子爺伍偉國透露，CafeLandmark有28年歷史，今次已是第四度裝修，更首次加入酒吧，成為全個置地唯一有酒吧的cafe。
