澳博（880）噚日終於成功掛牌，賭王何鴻燊喺上市儀式，不知幾咁風騷，仲不時隔空「明寸」、「暗寸」胞妹十姑娘何婉琪阻頭阻勢，並且一如既往爆發妙語如珠，講到砌低十姑娘官司嘅喜悅感受，身邊一班嘅執董似乎近得賭王多，都學咗唔少嘢。
賭王一開始已經拋出佢嘅經典名句「真金不怕洪爐火」，話澳博上市過程並唔平坦，但就成功越過重重阻撓，將各種挑戰化為機遇，仲加多句：「澳博𠵱家上到市，證明公司係光明磊落。」
賭王對股價充滿信心
講起佢同十姑娘前前後後擾攘咗兩年嘅澳博上市角力賽，賭王話：「我一定要剝十姑娘對牙！」，仲用「邪不能勝正」嚟形容之間嘅鬥爭。對於十姑娘打算上訴至終審法院，賭王不改牙擦本色話：「似乎唔知邊個輸晒呢？」
至於澳博一上市就潛水，自信心爆棚嘅賭王彈咗句「Wearehappywiththebeginning」，又相信恒指好，澳博股價自然會好。身邊嘅CEO蘇樹輝對於前陣子抽飛嘅投資者，充滿信心話「Theymaybuyback﹗」
一身紅衣打扮嘅澳博執董梁安琪亦唔執輸，以四字真言相贈傳媒，話澳博上市係「下定決心」、「排除萬難」，一腔賭王口脗，但問到炒賣有一手嘅四太會否趁低吸納澳博，同埋目標價，佢就三緘其口。
雖然澳博上市前一日，中央又出招調控澳門賭業，搞到噚日啲濠賭股下瀉，澳博股價都感受震動，如果消息係喺上個禮拜俾投資者抽飛期間公佈，唔知抽飛股數止唔止8080.1萬股呢？
電郵：mailto:[email protected]
