四川地震已經過咗兩個月，但香港呢邊捐錢同義工行動都冇話停，好多機構繼續做緊嘢，要做社會企業嘛。滙豐（005）早就經紅十字會捐咗1900萬人仔到災區，出完錢再出力，早前滙豐慈善基金就孖住中華慈善總會，仲有四川省教育廳，開個「四川地震災區班」畀四川省地震災區49位貧困小學老師，喺9日培訓中，教佢哋災後心理輔導同災後防疫健康嘅知識，等一班老師可以幫到災區學童。
其實獅子行慈善基金舊年開始喺全國貧困地區農村小學開授教師培訓班，為期3年，今次就特別針對四川地震善後工作，喺3年培訓班裏，滙豐會資助500幾萬人仔。
上堂之餘，為咗令一班老師冇咁緊張，滙豐安排受訓老師到北京史家小學觀摩，又到天安門睇升旗儀式，遊覽長城、水立方、首都博物館、北大及清華等名校。