華華噚日提到外滙管理局抦社會科學院計錯熱錢數，發改委經濟研究所即刻加入戰圈，佢哋嘅專家張岸元又講埋一份。
張岸元開宗明義話，熱錢研究根本係「偽命題」，佢仲用「拿尺子量度天上的雲，然後估計會下多少雨」做比喻，話計算熱錢冇定義，冇人能講得清熱錢係點樣流入？喺邊度嚟？流去邊？政府部門過去十幾年，曾經多次調查經外商直接投資（FDI）入面嘅「假外資」，最後都不了了之。
原因係一旦認真起嚟，就只有強化執行資本管制，結果只會嚇走外資，損失仲大；二嚟，學鄧小平伯爺「黑貓白貓」比喻，唔理真外資，定假外資，只要喺境內投資就冇分別。
張岸元仲提到，唔可以因為抗拒熱錢，就強化資本管制，反而當人仔加速升值，達到平衡點而現趨勢逆轉時，就要開始放鬆資本管制，其實同美國相比，中國熱錢規模細好多。