億鑽珠寶（475）行政總裁鄧志光之前喺銀行界浸淫咗約30年，6年前先轉行做珠寶，做咗咁多年賓架先嚟轉行，呢個決定並唔容易，噚日佢同傳媒飯局，講番當時嘅心路歷程，話由轉行到家陣，全靠一本經典著作啓示，呢本唔係西方嘅《聖經》，而係中國人嘅《易經》。
當年佢喺恒生（011）做賓架，億鑽係客戶，主席陳元興用咗成年時間游說佢過檔，但佢仲未下決定。後來睇《易經》，讀到呢本著作個名有三個意思：「變易」、「不易」同「簡易」，畀佢喺事業同管理上好大啓示。「變易」講人由出生到死亡不斷在變，所以覺得自己都應該變，加上老婆為佢求籤，求得「千里馬遇伯樂」，令佢即時開竅，到億鑽做CEO。
鄧志光初到新公司遇到唔少挫折，要重新適應，佢話掌握環境管理，度過逆境，同喺新崗位上建立制度，都係從《易經》中「不易」同「簡易」得出嘅道理，下屬都聽過佢呢番理論，就連教仔佢都係用《易經》。