煲呔做特首後實行親疏有別，畀陳克勤入特首辦「學嘢」取悅民建聯，陳克勤喺禮賓府消磨咗幾年光陰，早前辭職準備參選立法會，噚日佢同「師傅」劉江華去立法會門外影合照，由劉江華打開立法會大門，寓意帶埋徒弟入局，點知俾人阻撓，有立法會職員指兩人阻塞通道，要求佢哋借歪，陳克勤塊面𤓓到出煙。
被當透明
陳克勤帶埋張寫上「一生的承諾」橫額影相，佢話做議員係畢生承諾，今次落選下次會捲土重來。如果陳克勤排第二都落選，四年後再選，仲有得你排第二位？
𤓓𤓓哋匆匆影完相後，陳克勤未捨得走，原來佢同一班民建聯疑似候選人，打算向煲呔遞請願信，要求政府打擊通脹改善民生，八方見佢啲兄弟好識做，留定個好位畀陳克勤前排攻擊，不過煲呔落車後好似當佢透明咁，唔收佢封信，反而行去另一邊收咗阿牛請願信。連𤓓兩次，陳克勤自我安慰，話其實特首收信，只係循例由職員拆信，之後就交畀相關政策局，佢遞信落空冇所謂。