噚日兩位天王嫂「黎明嫂」樂基兒、「城嫂」熊黛林，喺尖沙嘴幫Nikon宣傳，佢哋仲拎住最新款嘅數碼相機四圍行扮影相。讀緊藝術、有修攝影嘅樂基兒，揸起相機明顯pro過城嫂。
唔使人哋送嘢
雖然樂基兒冇做訪問就走咗，不過現場就傳出佢收山嘅消息，話樂基兒完成手頭上嘅工作，就唔會再接job，實行收山。樂基兒所屬經理人公司Calcarrie's嘅負責人噚日否認話：「梗係唔係啦，都傳過好多次喇，佢其實係放假，做到幾時就要睇佢嘅功課，同啲job先決定到，應該喺8月佢會返美國，探吓屋企人，但一定唔係唔做，同埋喺9月同10月佢都仲有job。」
至於同場嘅熊黛林谷胸又露bra帶，連佢自己都話好耐冇着低胸裝，都有啲新鮮感。之前有傳佢嫌城城（郭富城）孤寒，所以分手，熊黛林話：「呢啲係古仔啫，唔識講，莫名其妙。」問佢係咪屬於貪錢或者現實嘅人？熊黛林話：「我都賺到錢，自己滿足到自己，唔使叫人買嘢畀我。」佢話自己之前拍戲只係玩玩吓、過吓癮，未來都係以模特兒工作為主喎！
此外，黎明噚日朝出發去北京，同日本設計師川久保玲傾合作計劃，有十幾個fans喺機場送機，黎明帶住黑超，心情幾好咁話：「去北京做嘢。」