林敏驄和曾志偉前晚在九龍灣為一連6場的「棟溝笑2008」揭開序幕，大放笑彈。開騷前有指賣票情況未如理想，但前晚入座率有九成，首場演出的收入扣除開支，將捐助四川地震災民。被傳離婚的阿驄，妻子陳伶俐和一對兒子都未見捧場，阿驄更在台上自嘲：「我冇老婆。」
志偉和阿驄扮嘢搞笑，又大講有味笑話，漠視台下的小朋友觀眾。阿驄完騷後被問到離婚傳聞時說：「暫時冇嘢講住，尾場（22日）我會有剖白。」 採訪：何永寧 攝影：黃偉雄
1.「係咪走咗佬」
阿驄和志偉在台上對調身份，志偉問：「你問我老婆係咪跟人走咗佬？」阿驄說：「你係咪咁玩我！」於是二人就做回自己，阿驄說：「冇，我係話我冇老婆。」
擔任嘉賓的阮兆祥和崔建邦則取笑陳伶俐與火車頭越南餐廳老闆的緋聞，祥仔問崔建邦若揀玩具給阿驄的囝囝，會揀豬頭、雞頭，還是火車頭？崔建邦說：「我揀乜都死。」阿驄大讚他很乖，並說：「咁揀『乖』頭。」大玩有味笑話。
2.嘲笑祖兒阿扁
大會播映了阿驄和志偉（圖下）的搞笑造型，包括扮演梁朝偉和湯唯在《色，戒》中的角色。阿驄問志偉早年遇襲原因：「邊個打你？」志偉遂與阿驄咬耳仔，並叫他說出來，他說：「我邊敢講，呢度大庭廣眾。」
志偉又揶揄陳水扁，並嘲笑英皇高層吳雨蠢，簽了容祖兒，簡稱是「水乳（雨）交融（容）」，阿驄說：「你講咗自己心底話，唔怕死，夠膽講多次。」
3.邦邦飯局剖白
崔建邦和無綫總經理陳志雲關係密切，自嘲愛吃腐乳和雲耳的阿驄問崔建邦可有到《乳雲飯局》，他答沒有，阮兆祥即答嘴：「你淨係夜晚先上佢屋企，食完飯又食甜品，仲有食士多啤梨同香蕉。有冇一齊搞……節目？」崔建邦說：「冇，一向都係佢搞，我做！」阮兆祥再逼供：「有冇同鄧健泓一齊做？」崔建邦說：「《勁歌金曲》咪做過囉！」阮兆祥笑說：「3P，PP喎。」崔建邦說：「3個就冇。」
4.梁炳唱三級歌
梁漢文（梁炳）被邀請上台唱《纏綿遊戲》，阿驄抵死把歌名改為《成人遊戲》，歌詞十分露骨：「成人遊戲過後，日做夜做仍不足夠，告訴我老竇；成日遊戲以後，又話我攰，又話我臭，又話我根本未瞓夠。」阿驄迫梁漢文重唱改寫的歌詞，落台後，他立即雞咁腳離開。
5.鹹濕佬的偶像
阿驄笑問：「鹹濕佬最鍾意乜神？係Edison（陳冠希）。」擺明寸因淫照事件後避走美國的陳冠希；阮兆祥則指涉淫照風暴的顏思穎身形太瘦。
阿驄和志偉又揶揄亞視的收視不濟，阿驄說：「因為有種藥叫『亞視不靈』，所以佢咪唔得囉！」
