雖然呢頭曼城買唔到「細哨」返嚟，下季又少一個球星睇，不過我求大俠就覺得一班曼城球迷仍然好忠心。話說曼城喺歐協盃首圈外圍賽今晚要山長水遠作客法羅群島球隊EB史特雷約姆，但係仲有12個超級曼城fans決定租船去睇波，過程辛苦到好似唐三藏去取西經一樣！
最少花38小時
曼城早排拎咗公平競技嘅獎項，所以有得踢今屆歐協盃，不過由於要由第一圈打起，所以一定會抽中啲騎呢隊伍，但勢估唔到佢哋要去到法羅群島對EB史特雷約姆咁大鑊！雖然係咁，但係一班好有心嘅曼城球迷，仍決定去法羅群島支持球隊，但由於真係畀唔起機票錢，佢哋一行12人就每人夾咗285鎊（約4,450港元）租咗隻72呎長嘅拖網漁船，諗住由海路去法羅群島。
不過其實由英國出發去法羅群島一啲都唔簡單，首先佢哋由曼徹斯特市搭車去鴨巴甸港口，已經用咗佢哋一晚時間；跟住由鴨巴甸港口搭船去勒威克島呢個中轉站又要用12個鐘頭；最後由勒威克島去到法羅群島仲要用多26個鐘，而呢26個鐘只係假設天氣好、海面平靜先得，如果唔係分分鐘要成30幾個鐘都唔出奇，不過佢哋都應該趕得切喺開波前啱啱入到場。
Fans樂在其中
雖然呢次作客去法羅群島睇波一定係辛苦到爆，不過呢12個球迷一於好少理，仲覺得好過癮，其中一個話：「我哋可能係史上第一批搭漁船去睇波嘅球迷，不過仲要求神拜佛曼城入多幾球波俾我哋睇呀，如果唔係就搵笨啦！」我求大俠真係要寫個「服」字畀佢哋！