喺均富會計師行做咗15年，最近升為執行合夥人嘅梁兆基Jonathan（唔係獅子行同星展兩位同名同姓才俊），原來係非洲華僑嘅後代。
佢爺爺喺1930年由中國佛山移居至南非約翰內斯堡，而Jonathan亦喺當地出世，雖然佢曾經跟老竇嚟香港讀英基中學，不過後來就返去南非讀大學，同時亦覓得都係中國人嘅嬌妻。
Jonathan話，南非居住環境本來相當舒服，但30至50零歲嘅黑人失業率太高，佢哋逼住鋋而走險，好似泊喺街嘅私家車，都會一夜之間被偷然後變賣，賊仔又識避開倒後鏡死角，匿埋車尾潛入別墅打劫，搞到好多人返工都要帶槍，就連佢自己每個月都會練習槍法，以防萬一。
佢仲話，南非治安差到冇人信，衞生條件咁惡劣，到南非邊界外遊都要自備血包，以防因為輸血而染上愛滋。所以Jonathan畢業後，只喺當地會計師行做咗4年，就喺93年同老婆返嚟香港闖天下，自99年以嚟都未返過南非探親。