論3D格鬥遊戲全球認受性，世嘉《VF》雖然日本Hit爆，但唔啱外國人口味，反觀Namco《鐵拳》同《SoulCalibur》則歐美大熱，賺外滙多過日圓；舞刀弄劍劈到九彩嘅《SC》將推出第4集，製作人為挽回上集嘅評價，用番二代嗰招跨平台兼搵外援幫手撐場，結果請來《星球大戰》兩大重要角色黑武士與尤達大師，單係呢點已令唔少人扑鎚科水！
文：陳福榮
雷射劍鬥聖劍邪刃
《SC》呢類遊戲有隱藏人物唔奇！但今次《SC4》意外係俾佢搵到個《星戰》版權過嚟，現知黑武士屬PS3專用、尤達大師就XB360專玩；就網上機迷評語，尤達雖貴為《星戰》劍聖，但論氣勢同戲中實打能力，黑武士吸引力絕對大於尤達呢隻電影「布公仔」。為此換機、買機？應該唔會?!但好多有雙平台Gamer話有得揀就必買PS3囉。
另外，今集最後波士嘅造型最近亦經已曝光，佢背脊嗰副利刃擁有多個形態，一不留神隨時俾佢插到成身穿晒窿，可能會惡打過上次嗰團火喎。
誠邀畫師設計新人
同廠《鐵拳》曾力邀唔少著名漫畫家幫手，為人氣角色設計番啲特別衫，獲得不俗評價。到咗《SC4》有關方面更大開門戶，邀請外援從冇到有咁整4個全新角色出嚟，佢哋係擅畫靚女嘅大暮維人、吉崎觀音、出淵裕同奧浩哉，因此呢批新女造型上極有個人風格，同原本嗰班偏向硬橋硬馬嘅例如Sophitia同成美娜等相去甚遠，淡化番全體基本角色嗰種平穩味道。
搞鬼角色由我創
雖然自創角色並唔係今集先有，但《SC4》卻能夠將佢發揚光大，無他嘅以往只能安坐家中享受呢啲原創騎呢人物，𠵱家就可以透過網絡同全球各地高手過招。
創作規則，都係先取自某個既有角色為骨幹，選定出招叫聲、外表特徵、顏色變化、技能同特殊能力等後再安排好初期裝備，咁就可以透過遊戲過程中取得嘅金錢，進一步購買各種武器防具令角色變強，充滿RPG打怪儲錢升級嗰種風貌。
光影特效冇得彈
由PS2進化至PS3與XB360，唔使講運算能力同畫面顯示都高出幾班，720p高清顯示已能將戰鬥場地變得更有質感，拉慢爆格之類缺點更去蕪存菁，打起嚟自然更得心應手。之不過好多Fans都抱怨，上集玩佢已經買咗個專用大手掣，如今想唔再買過PS3或XB360嘅專用掣又唔得，但冇計想打得叻自然要付出代價。
戰鬥系統方面，記熟每個角色嘅縱斬、橫斬與8方向跑動態係基本中嘅基本，反彈同格開招式亦唔係新嘢，不過佢亦追加咗一擊必殺「CriticalFinish」和打爆裝甲「SoulCrush」，後者唔止對女角可觀性十足，亦能構成重大殺傷力，隨時扭轉形勢都靠佢咋！
Profile
機種：PS3、XB360
廠商：NGBI
類型：FTG
人數：1-2人（網上2人對戰）
日期：7月31日
