楊千嬅、古天樂同楊采妮早排應聯合國兒童基金嘅邀請探訪四川地震災區，此行佢哋最深體會係啲細路仔嘅心靈受到好大創傷，其中一日佢哋去到臨時學校同班細路傾偈，有個男仔因為搵唔到家姐不停喊，搞到佢哋要出盡法寶輪流𠱁個細路開心。
見到屋企都驚
聯合國兒童基金特別重視保護兒童，並確保兒童獲得社會心理支援。呢次安排古仔、千嬅同楊采妮探訪四川災區，就係希望佢哋可以帶畀班細路一啲安慰。喺災區嘅幾日行程，佢哋到過臨時學校、板間房安置區同重建緊嘅災區，古仔話：「今次接觸到最多係細路仔，好多細路因為地震失去父母，我同佢哋傾偈時，發覺佢哋有好大陰影，連見到屋企都驚，要平復佢哋嘅心理仲要好長時間。」
千嬅喺呢次四川之行發現當地最缺乏亁淨水，聯合國兒童基金捐咗20台淨水機畀災區，千嬅話：「四川目前嘅水仲未可以飲用，所以需要好多台淨水設備提供畀災區，因為咁嘅原因送淨水設備畀四川最實際。」千嬅都覺得災區啲細路所受嘅心靈創傷好大，聯合國兒童基金已經搵咗一批心理專家去幫助佢哋。