中國股民渴求政府救市，於是傳說有所謂「平準基金」出手，官方媒體「穩市」之說。新興市場嘅股民都迷信政府力量，大戶力量，認為兩者可以操控市場。其實如果散戶真的有此理念，不如退出市場好過。乜唔係啫，官商大人物如手握指揮棒，可以將股市舞上舞落嘅，即係佢哋贏梗啦，我哋散戶只係大人物嘅點心，輸硬，買賣股票嚟做乜？只有相信市場，相信基本因素，先至有投資嘅理由、理據進入股市。
中國官員操控一切人民行為，已成習慣，對股市之升升降降，自不然有鋪「揸𨋢癮」。「揸𨋢」招式之中，如出口術，限制或放寬基金開辦，勸喻基金入貨等等，已經唔新鮮，七月九日居然傳來消息，就係禁制基金公司高層管理人員（內地叫基金高管）出境，呢招點樣可以影響股市升而不跌呀，一時不明所以。基金高管留在北京上海深圳嘅話，唔通全部一齊入市？內地招數之中，呢招最新穎。
點知言猶在耳之際，七月十二日就傳出內地一間非合法註冊嘅網上交易平台，叫做華夏交易所嘅高管挾帶一億七千萬元人民幣私逃，走咗去洛杉磯，全國二十萬股民受影響嘅消息。我等平民，只有嘆服，可能係中證監早已知道有人想逃亡，故此發出禁制出境令。但結果都係畀負責人走咗，可見中證監之監管能力或執行能力，值得懷疑。信佢嘅「平準基金」救市，股民未免頭腦簡單及天真。
平準基金，古已有之，記得中學讀歷史，有西漢桑弘羊「均輸平準」法，桑弘羊飽受後世儒者批評，但平準概念仍然流傳二千餘年，台灣曾經為股市設立類似平準基金嚟調控股市，十幾二十年來，有乜嘢救市成效？答案係零雞蛋。如果平準基金係好掂嘅，負責官員次次懂得低買高賣，啲官員老早發大達退休咗啦。之不過，中國歷史教訓無人理會，歷年不少當權者都認為自己有力影響市場，非獨史太林，毛澤東為然，𠵱家香港夠有政客議員不斷要求政府管這樣管那樣，以公平之名，不斷破壞市場秩序啦。