煲呔噚日出席今屆立法會最後一次答問大會，社民連陳偉業問最後一條問題，批評煲呔上任後大搞親疏有別令市民反感，要求煲呔改弦易轍放棄大細超思維，煲呔聽完後似乎不滿有人挑釁，黑口黑面咁話，喺佢心目中，所謂「親」，就係指親近市民，以市民利益為優先，「疏」就係指疏遠市民，以從政者自己政治利益為優先，呢個就係佢對於「親疏有別」嘅諗法。
親疏有別咁解嘅咩？正所謂聽其言，都要觀其行，立法會噚晚舉行休會惜別晚宴，煲呔到場逗留約10分鐘就走，八方收到風，佢滾水淥腳，因為要趕去「煲呔針」大班鄭經翰62歲壽宴，惟有撇甩其他幾十個議員。何謂親疏有別，有辦你睇。
可能八方孤陋寡聞，對於煲呔新解親疏有別講法，真係未聽過，煲呔咁都講得出，真係亂噏兼曲解，下次電視台直播特首答問大會，應該顯示「家長指引」警告字眼，否則教壞細路，再鬧出「八萬五」笑話，唔知向誰問責。
既虛偽又無恥
其實煲呔幾年前都為親疏有別下定義，佢接替老董做特首後，06年初公開表示要對唔同政黨親疏有別，支持佢嘅政黨多溝通，反之就講多無謂，甚至親到民建聯總部，為興建新政府總部撥款拉票，又安插民建聯陳克勤入特首辦培訓，出力出錢（公帑）示範親疏有別標準。
當年煲呔施政親疏有別，主因係03年7.1後，保皇黨慨嘆跟住老董有辱無榮，煲呔上場後要組成執政聯盟，為箍住保皇黨惟有側埋一邊，過去幾年明益保皇黨屢見不鮮，副局長、政治助理分餅仔畀保皇黨引起公憤，反映市民對親疏有別已經忍無可忍，煲呔忽然新解親疏有別，既虛偽又無恥。
如果「親」係指以市民利益為優先，委任保皇黨做局長、副局長，邊緣化泛民，如何有益於市民？有益於保皇黨、以左派政治利益為優先就真，煲呔親疏有別在先，民望隨後而跌又怪得誰呢？公民黨黨魁余若薇形容煲呔亂噏係「發晦氣」，民建聯主席譚耀宗受惠於親疏有別，好風凉咁話，最重要係派糖可以令市民紓困，特首民望升跌佢哋唔care。
mailto:[email protected]
【煲呔新語】
想知標準答案請聯絡特首辦
電話：28783300 電郵：mailto:[email protected]
（雖然佢解咗你都未必知點解）