朗尼：「咪睇小我細佬！」曼聯球星朗尼嘅親細佬約翰朗尼（JohnRooney）年僅17歲，喺禮拜一同英乙球會馬爾斯菲簽約，正式成為職業球員，但就俾外界揶揄他倆係「龍兄鼠弟」，大家即管放長雙眼睇佢哋日後會否並肩作戰？
周薪2,300港元
朗尼家族一門三兄弟，大哥（WayneRooney）係蜚聲國際嘅曼聯球星，無人不識；21歲嘅二佬格拉米（Graeme）尚未爆出驚人事迹，但外貌同大哥一個餅印，出街經常俾人認錯，仲試過喺大哥結婚前嘅單身派對上怒豎中指，真係話佢唔係「朗尼」都冇人信；而17歲嘅約翰則身形、外貌都同兩名大佬迥異，瘦瘦削削，禮拜一仲簽埋職業合同，希望走番大佬條路。
約翰知名度欠奉，馬爾斯菲只提供一份兩年150鎊（約2,300港元）周薪嘅合約，與大哥喺曼聯賺嘅11萬鎊相距733倍，即使比起大佬當年效力愛華頓時嘅5萬鎊，亦相距333倍，而前者未夠17歲就喺英超射爆阿仙奴，更係一球成名；若以起步點計，約翰真係「仍須努力」。
處子演出即「士哥」
然而，馬軍嘅青年軍教頭就對約翰讚不絕口：「佢身體對抗性好強，只要佢繼續同一隊多加鍛煉，他日肯定會係一個多產射手。」唔使等他日，馬爾斯菲周一同前領隊恩斯率領嘅英超球會布力般流浪「拍跳」，雖敗1:2，但約翰處子亮相一隊就有「士哥」，都算係對英超球會有進賬。莫欺少年窮嘛，我求大俠都年輕過，最討厭人哋用白鴿眼小覷年輕人，「龍兄鼠弟」定「鼠兄龍弟」真係要睇過至知！