美國金融市場波動情況似乎毫無改善，由房利美及房貸美，甚至被政府接管嘅中型銀行IndyMac都大把問題，會唔會延至其他環節好難估計，再加上伯南克都認衰話美國經濟好多問題，睇嚟短期外圍金融市場都好難靜落嚟。
外圍市場波動，所帶來之其中一個短炒機會，是美元疲弱之下，金礦股應可看高一線，紫金（2899）、招金（1818）兩大金礦股應該未升完。由於早前油價狂升而金價唔郁，故此油價雖由高位急挫，但只要美元繼續弱，金價仍可望續升。
至於油價急挫，因油組（OPEC）都出報告話未來原油需求將放緩，事實上，全球經濟增長放緩已成事實，原油再炒高上去都好難有承接，故此油價睇跌相當合理，航空股及航運股係時候趁低吸納。
鉀肥或取消價管
在波動市下，揀選其他股票則可留意大戶手影。中化化肥（297）近日股價逆市向上，除因內地傳媒報道，鉀肥或將取消價格管制外，其第2大股東美資大型化肥商PotashCorporation近期非常積極增持中化肥股份，申報分別上周四及周五，以近6元價錢，增持合共697.2萬股，涉資達4100多萬元。
資料顯示，Potash今年4月已4度增持股份，5月及6月份都無停止過增持行動，連同以上增持，Potash近3個月已11度增持中化肥，合共增持8272.4萬股，以平均價5.8元計，涉資多達4.8億元，相當大手筆。有呢個潛在大買家，中化肥應該唔易大幅下跌，具抗跌力之餘仲有可能受惠利好政策，淡市中算係有唔錯嘅值博率。