想睇高清電影，買部入門級Blu-ray碟機講緊三、四千蚊，而且係齋Play嗰隻，諗起肉赤！但假如話你知，呢個價唔止睇到Blu-ray，佢仲係一部全能電腦，上網聽歌瓣瓣掂，你又點睇！近期腦場劈價，砌部「黃金嘜」睇高清嘅電腦，價錢亦差不多，話晒自己落手落腳砌機，滿足感都爆晒燈啦！
記者：陳國輝
攝影：林栢鈞、伍慶泉
至抵組合！強搭Sony藍光
查實四千幾蚊砌一部睇到Blu-ray嘅電腦，已證明你好知慳識儉，但竟然仲諗住執名牌嘢？發夢咩！話又唔係咁講，今次腦界高手阿Dan就幫大家砌咗部價錢又筍，仲有名牌嘢嘅「黃金嘜」組合。最值一提係選用SonyCCD-BDUX10SBlu-rayROM，一嚟佢係大牌子，Fans例撐；二嚟表現穩定，唔容易睇睇吓死機，不過，佢屬於該組合內價錢最貴嘅器材，佔總價三分之一㗎！仲有，AbitAS78HATi780G底板也值得推薦，佢優勝在DisplayCardOnBoard，咁已經慳番一筆，從後發現佢仲支援一組HDMI輸出，即係話除咗駁電腦芒之餘，仲可以駁埋高清LCDTV睇片，同高級家庭影音基本上真係冇乜分別！
呢套組合唔使$4,500，同一部Blu-rayPlayer差唔多價！
散件逐件執
AopenMATX機箱細細件，外形設計甚似高達。
顯示卡及音效卡統統OnBoard，慳位又夠平。
唯一最貴裝置，就係呢部SonyBlu-ray機。
可利用DVI輸出，也可直駁HDMI到LCDTV。
有啲火牛好嘈，最好揀啲有靜音或散熱器。
激筍入門級
畫質實測
Test1演唱會
Lighting勁靚，只係初頭撈碟慢咗少少，全程基本上都好流暢。
劉華固然Sharp，台下觀眾亦唔覺黑色一笪笪，清楚到幾乎數到人頭。
Test2外語片
荷李活製作，前後景立體感突出，連女主角嘅豐滿身材亦成為焦點。
就算係黑夜追逐戰，亦睇見黑位處極少Noise，草地好細緻！
配色彩微調 勁過齋Player
以前用電腦玩Multi-Media基本上冇乜要求，只要睇到、聽到就夠，但今時今日，如果仲有呢種心態要改喇！自從年幾兩年前WindowsOS加入MediaCenter之後，電腦嘅身份轉變晒，玩家用佢嚟睇電視不特止，仲可以預錄節目，駁埋WLAN更可無線直過手機屏幕欣賞，加埋一隻Remote任你搞，簡直係新一代家庭影院！不過，阿Dan今次介紹嘅係入門配置，MediaCenter成本高，都係玩返XP，機內特別裝咗最新版本嘅Blu-ray播放軟件《PowerDVD》，內置幾種模式，啱晒「儍瓜機」用家，另外更配置BasicColor以及AdvancedColor等微調方法，較之一般Blu-rayPlayer僅光暗與平衡度調校，花款多啲喎！
內置劇院及生動模式，最啱入門玩家。
自問專業，不如喺BasicColor調色好過。
腦場特搜：機箱扮混音器
咁大個機箱放喺屋企，都咪話唔阻碇！但話說回來，如果要解決都唔係冇辦法，最佳方法係買個外形靚仔嘅Case。走到深水埗腦場，最近見好多店舖出售音響器材，唔通高登轉型？唔係，據Sales講，其實好多玩家已轉投AV電腦行列，純粹玩影音。例如5.1、7.1聲道嘅喇叭突然多咗，而最原始嘅直身電腦機箱，亦改為橫放式，外觀十足混音器咁，價錢仲由幾百至幾千不等，想幫自己部機裝身，可以諗吓喎！
ASUSP5KSE/EPUIntelP35相對較貴，但啱晒打機用，售$735。
OrigenS21T機箱具備TouchScreen，可直接控制電腦，售$7,000。
平霸機箱首選SliverstoneLC17，可裝雙風扇，睇片散熱特快，售$780。
GRTGL2機身有一半係塊鏡，另一部份用鋁製成，售價$799。
正都（2361-3268）