獅子山學會又在西洋會搞論壇，呢次係「中文台」，講廣東話，與上次完全英語對白唔同，於是參加講壇者全為本地人。
講乜嘢呢，獅子山學會搵到施老闆永青與商務及經濟發展局副秘書長黎蕙明打對台，講「競爭法」。黎副秘都算係打得之人，夠膽單刀赴會，努力為政府意欲訂立競爭法辯護。孫柏文呢個肥仔說話有骨，稱讚黎副秘係中華鱘，勇敢跳入海洋公園嘅大魚缸！
黎副秘照本宣讀，沿着PowerPoint逐點解釋競爭法諮詢與大概。跟住到施老闆發揮，佢話自己演講，從不準備，話從心中來，預先寫好稿，備好課之人，多數係抄書引述權威之言，未必真係有料。有一次佢去演講，主辦人話佢冇準備，施老闆回答：「我自三歲開始，已經日日準備」，有料之人先至夠膽講呢句話！
施兄大肆批評競爭法之議，指特區政府無事搵事做，為商界增加成本，為會計師、律師、經濟分析師增加就業而已，佢話每逢政府立法，梗係話保護弱者，維持公平競爭環境，但實際上，大企業先至有資源（人力物力）嚟遵守政府新法規。譬如政府為地產代理監管局立法、監管代理業，推行以來，益晒中原美聯兩大公司，兩大愈來愈大，中小地產代理愈來愈難搵食，施老闆話道理簡單不過，中小企既要顧及地監條例，又要同中原美聯競爭，難度甚高。有見及此，施老闆預言，競爭法出台後，最終受苦者就係中小企，大企業增加咗不方便，但係絲毫無損。
到咗發問時間，所有問題衝着黎副秘而來，呢位女士口才便給，一於使出政府金鐘罩──重申政府立場，不作個別評論，提出外國例子等等，兵來將擋，水來土掩，雖然十分吃力，但不致遍體鱗傷，可以平安游出魚缸！曾淵滄教授話新加坡政府於兩年前推出競爭法，純為應景，人有我有，但新加坡大企業幾乎全部國營，全獲豁免，於是競爭法衙門編制十分細，無事可做，曾教授質疑香港特區點解要立法，是否亦係人有我有呀？如果係咁，特區政府唔應該每年撥款數千萬元嚟維持競爭法事務委員會與審裁處喎！