育有一女的李嘉慧，上周誕下重7磅2安士的二女Sylvia，比預產期早一星期。懷孕期間經常擔心長女Valerie呷醋的李嘉慧，更進行狂送小禮物計劃，讓長女一見妹妹就開心收禮，難怪長女爭住錫妹妹。
恭喜恭喜，又有名模媽媽添新生命！李嘉慧（Sofie）上周三晚上順產，誕下7磅2安士女兒，取名為Sylvia。已出院回家休養的李嘉慧，昨日在電話中透露女兒比預產期早一星期出生，她說：「之前啲朋友成日問我會唔會8月8日生個奧運BB，我其實預產期係7月尾，今次臨生前一個星期有啲預兆，好似好緊張想生，老公都有入產房。」
大女爭住抱
李嘉慧謂生完第二日，長女Valerie去看妹妹時，李嘉慧即時送了一份禮給大女，她說：「我一早部署好，大肚時已經用妹妹嘅名義，不斷送禮物畀佢，Valerie一去到醫院，我同老公又送禮物畀佢，佢見到瞓着咗嘅妹妹都好開心，仲爭住抱。」問她老公有甚麼獎勵，她說：「佢咪送咗BB畀我，同埋之前已經安排咗一個trip，係同另一對大肚couple一齊去新加坡度假。」
等爺爺改名
已有湊女經驗的李嘉慧，表示現時人奶及奶粉雙管齊下，至於喼弗補身就容後再算。至於女兒名字，她說：「因為大女Valerie係跟爹哋名嘅字頭改，所以𠵱家個女跟我用S字，之前都叫BBS，𠵱家改咗叫Sylvia，中文名就留番畀爺爺改。」她又謂現時未決定是否擺滿月酒或百日宴，看囡囡及自己身體情況，再作決定。
港姐出身的李嘉慧，3年前嫁給金融才俊任偉成後，逐漸淡出模特兒界，專心相夫湊女，現時育有兩歲長女Valerie，一向貪靚的她，在懷孕期間一直小心飲食，更依循琦琦多吃藍莓生大眼B女的獨門秘方，又多聽莫札特古典音樂作胎教。
採訪：梁錦雯
