雖然財委會仲要開會傾四川撥款，後日又有特首答問大會，但第三屆立法會噚日已宣告正式收爐，唞完暑10月先復會。到時就算唔係人面全非，都應該有唔少新面孔。對於嗰班如無意外做埋呢屆就bye-bye嘅同事，好似做咗23年嘅馬丁、同做咗7個月嘅陳太，唔少議員噚日都臨場加演棟篤笑，喺告別議案中乘機點評一番，場面惹笑。
平日唔聲唔聲嘅內會主席劉健儀發言時話，馬丁卸任後大可以去大學教繙譯，教publicengagement同pressfor應該點譯，唔知曾鈺成會唔會捧場；佢又祝馬丁早日抱孫，由「民主之父」升格做「民主祖父」。對於「雀林高手」陳太，Miriam就叫佢日後除咗會有多啲時間打牌，仲可以教人着衫，更可以教人點樣避免「扯衫尾」喎。
小李飛刀例不虛發
另一位告別立法會嘅，係成功由「江青」轉型為「班長」嘅主席范太。幾個議員都話，將擔任人大常委嘅范太其實好溫柔，相信長毛一定感受到。范太對長毛嘅溫柔，田少卻有另類解讀，事關每次長毛例牌叫完幾句口號，范太都會例牌苦口婆心幾句，諗落似扯貓尾多啲喎。
一向女強人咁款嘅范太就自爆，近日開始有瞌眼瞓嘅習慣，真係唔走唔得。佢仲話，相信未來嘅立法會主席，會比佢更聰明、轉數快同苗條。但唔知喺「管理」長毛方面，又會唔會好得過佢呢？
白鴿黨未來主席大熱單雞亦玩自爆，佢話細個時原來個花名叫「豉油雞」、「阿雞」，80年代開始從政，係因為遇人不淑，識到高達呢個衰朋友。一向同政府關係唔差嘅佢特別向政府提水，話一見到李國寶返立法會投票就要小心，因為佢係小李飛刀，例不虛發。
人稱「煲呔針」嘅大班當然唔會被放過，劉健儀苦笑話，對於大班唔做議員做電台好可惜，因為日後議會將會少咗一支針。不過，佢澄清話，講嘅唔係個條「煲呔針」，而係針鋒相對嗰支針啫。
已經宣告同立法會bye-bye嘅工聯會鄺大狀就話，最唔捨得嘅只係立法會嘅咖啡，至於佢同嫻姐同王國興組成「福祿壽」嘅風光日子，佢就唔係咁緬懷。不過，臨別秋波，佢都乖乖跟住嫻姐喺立法會影相留念，因為以後都唔會再有三人行嘅日子囉。
mailto:[email protected]