前中國第二大富豪歐亞農業楊斌喺瀋陽投資嘅荷蘭村，將會被瀋陽市政府以公開招標形式拍賣，根據《東方早報》報道，有意嘅買家包括現時亞洲女首富碧桂園（2007）太子女楊惠妍，因為碧桂園喺瀋陽揸住唔少地皮。
諗番起楊斌嘅荷蘭村，華華都有啲欷歔。楊斌曾經被美國雜誌《福布斯》評為2001年內地第二大富豪，身家一度高達70幾億銀人仔，佢成立嘅歐亞農業喺香港上市時，公開招股超額78倍，佢更曾經被北韓金正日委任為新義州特區首長。
瀋陽荷蘭村係楊斌當年其中一項重大投資，計劃將荷蘭村打造成歐陸風情嘅房地產。但後尾楊斌因不合法使用農地、欺詐、賄賂同逃稅，被內地起訴，02年被鋃鐺入獄，重判18年，荷蘭村當然爛尾收場。佢一手創立嘅歐亞農業亦冇好收場，被證監會指誇大收入勒令停牌，最後被港交所（388）除牌。