今夏以大製作《赤壁》咁嘅氣勢加盟奧地利維也納隊，仲喺上海浦東機場留下「提高維也納隊水準」豪言嘅孫祥，周日遭火燒連環船式嘅慘敗！事緣佢喺聯賽2:2和卡芬堡擺烏龍，賽後慘受維也納及內地球迷夾擊，全身佈滿唾液！
孫祥係國足頭號球星，肩負中國足球崛起之重責，今夏由燕豪芬以首位參加歐聯嘅中國人身份，「屈就」加盟維也納隊。點知周日對卡芬堡完場前（其實當時已經係補時4分鐘），對方禁區內傳中入遠柱，祥哥無壓力下用「黃金左腳」踢個掛網波入網，之後球證仲即刻吹雞完場！上周祥哥曾獲邀參加自由球大賽（因事缺席），可見佢呢隻左腳幾有「Q嘜」保證，估唔到會整個「烏龍波」出嚟。
「擺老烏」遭掟酒杯
一直以來，對祥哥抱以無限期望嘅維也納球迷即場發難，部份人仲衝咗入場，有啤酒杯嘅掟杯，身無長物嘅惟有爆粗，「簡直係轉會垃圾！」唔好以為係我求大俠吹水，Youku網站有片段提供㗎！
從現場片段所見，孫祥先抱頭作失望狀，完場哨聲響後，繼續欲哭無淚；之後見四周球迷喊殺聲不絕，十足趙子龍亂軍救阿斗咁嘅場面，身經百戰嘅祥哥終於留下英雄淚，仲即刻衝入更衣室㖭！我求大俠問大陸行家有關祥哥現況，對方以小喬咁落寞來形容呢位球星。
內地網民群起挖苦
我求大俠一直心繫中國足運發展，於是即時瀏覽內地網民留言，發現幾乎篇篇都係挖苦祥哥！有人鬧：「丟架丟到去國外！」、「咁嘅臭腳賺咁多錢！？」內地部份憤青真係太不可理喻啦！肯定係買咗維也納贏波，輸錢先當正祥哥係殺父仇人；祥哥！你要振作，咪俾人睇死呀！