即將代表民主黨夥拍甘乃威出選港島嘅楊森，噚日趁立法會提名期開始前，推出名為《輕身再上路》嘅新書，講述自己多年議員生涯。森哥話個書名唔易起，因為佢𠵱家雖然已經退咗休，但由於仍然會參選，所以未算係全退。一向顧家嘅森哥，𠵱家仲有個12歲嘅囝囝，同9歲嘅囡囡，所以佢話為向老婆交差，喺退休後已即時搵咗兩份兼職，幫補家計。
唔明點解咁冇志氣
對於有傳聞話楊森排番名單首位，佢就話唔知邊個放啲咁嘅風，指𠵱家民主黨部署冇變。森哥噚日一面介紹新書，一面睇番舊相時，直指話有一個人一度令佢十分扯火，就係即將拍住葉劉出選嘅史泰祖。森哥噚日一睇到史泰祖當年跟住民主黨成員遊行幅相，就話唔明史泰祖點解咁冇志氣，竟然一邊自稱溫和民主派，一邊就同葉劉合組名單參選。
激氣嘢講完，森哥講得最多嘅就係囝囝，原來佢囝囝踢波好叻，即將代表香港青年隊出賽，嚟緊仲會上北京踢波。森哥話，希望囝囝透過踢波，可以學到啲人生哲理，明白喺適當時候就要傳波，唔係一定要由自己起腳射入。八方話，其實佢自己引退，都係交波唔獨食嘅典範。