【本報訊】立法會主席范徐麗泰在卸任前炮轟特首曾蔭權和高官，指曾蔭權令人產生政府想避開立法會的印象，他幾年前已承諾每個立法年度至少出席四次答問大會，但在5月第三次到立法會出席答問大會時，已經似乎是想跟立法會道別。
范太又批評，有官員自以為是精英和聰明，結果易犯眾怒，「希望自以為聰明嘅人，聽吓啲佢認為最基層嘅聲音，因為嗰啲人先係佢老闆」。
已宣佈不再參選立法會的范太，昨日在立法會舉行今屆會期結束前的簡報會時，以「互相尊重，以誠待人，一視同仁，合作有望」16字，總結對行政立法關係的期望。
在談到有高層官員避開立法會時，范太主動舉例，指曾蔭權第三次到立法會出席答問大會時，「好似係想同我哋道別咁樣，但佢其實幾年前應承咗，一個立法年度至少嚟四次」。她指出，「佢（曾蔭權）有咁嘅承諾，就應該去做」。
指官員有精英心態
范太又批評，有官員和立法會進行閉門會議後，只將會上一方的看法向外透露，令另一方難再發表意見，「呢啲以前有發生過，希望將來唔好再發生」。
范太更批評官員「自以為聰明嗰啲，好易就被聰明誤，自以為精英嗰啲，好易就犯眾怒」，她指有官員有精英心態，不願與基層化的議員溝通，「呢種精英心態，喺政治上嚟講，會造成好大危機」。她指出，官員應該了解老闆是市民，「所以希望自以為聰明嘅人，唔好再自以為是，聽吓啲佢認為最基層嘅聲音，因為嗰啲人先係佢老闆」。
對於泛民不滿政府親疏有別，范太就指，其實有建制派議員和政府關係亦十分疏離，「佢哋話政府拉票時唔拉佢，但投票時就要佢哋支持」。她認為，行政立法應「和而不同」，政府對議員應一視同仁，「唔同意見係好嘅，因為香港係多元化社會，如果只有一種意見，就好可能會出錯」。