新地郭氏三兄弟嘅豪門恩怨早排成為城中熱話，唔知大家又記唔記得一年前，副主席郭炳聯嘅太太郭劉寶賜搭飛機，因為唔肯放好個名牌袋，同國泰空姐鬧上警署，成為A1頭條新聞？雖然事隔一年，有國泰空姐最近同八方講，自從嗰次之後，𠵱家勸闊太放好手袋都會陰聲細氣，睇人面色無可避免，但總好過去警署之後仲要俾公司照肺。
佢哋話，公司到𠵱家都冇一個誰是誰非嘅說法，好似「八萬五」咁，唔講就當冇件事。老闆怕得罪闊太，班同事就私下幫國泰改名做「郭太航空」，國泰城變「郭太城」，發洩吓不滿。今日一班國泰空姐會遊行追討假期工資，八方建議佢哋不如去搵郭太；有郭太支持，變身「郭太空姐」，隨時勝過搵勞工處。