鄧特希監製嘅亞視新劇《法網群英》所有演員，噚日齊集喺亞視大埔總台，見證鄧特希同亞視營運總裁何定鈞進行播映授權簽署，一眾演員吳啓華、陳秀雯、張文慈、谷祖琳、萬綺雯等等，幾十個演員出嚟晒冷，何定鈞話除咗呢部重頭劇，佢哋仲會開拍《勝者為王2008》，由蔡少芬同張智霖擔正。
「好鍾意食麵」
雖然噚日宣傳聲勢浩蕩，但點都唔及俾人話係第三者嘅吳亭欣搶鏡。吳亭欣之前俾人影到佢踢拖同已婚富豪馮潮澤親密食魚蛋粉，之後佢俾人話係第三者，馮潮澤係息影女星顧美華嘅妹夫，顧美華日前喺公開場合，話最關心係妹妹，同埋覺得小朋友好無辜，佢仲話信因果，可能係佢（妹妹）前世欠咗佢（妹夫）！
吳亭欣噚日表現EQ極高，佢淡淡然話：「我完全唔識佢（顧美華），唔知佢係乜人，我同人哋做普通朋友，唔使向人交代，公道自在人心，日久見人心，私人事唔需要解釋，我屋企人會明白，我唔會刻意避忌，唔會加多或者減少同佢（馮潮澤）接觸。」至於馮潮澤去咗英國同老婆箍煲，吳亭欣話人哋嘅家事唔會理喎！吳亭欣對於所有指摘充耳不聞，佢仲好風騷咁話：「我係好鍾意食麵同着人字拖㗎！」