噚日法國國慶，法國駐港領事館喺會展搞生日party，除咗請嚟政務司司長唐英年做主禮嘉賓，本地猛人都有出席，財經事務及庫務局局長陳家強、霍震霆、太古中國主席陳南祿、中信泰富（267）范鴻齡等都有到賀，最引人注目，當然係跟兩個細佬打官司輸官司後，久未露面嘅新地（016）郭炳湘啦。郭炳湘孑然一身出現，冇保鑣，冇人陪，亦冇喺特別通道入場，當其他剛到嘅嘉賓排隊同領事握手入場時，大郭生亦好守規矩排埋一份。
華華難得見到大郭生，梗要問候吓近況，呢排「冇乜特別嘢忙，都係照平時咁」，當華華問到佢家陣冇做主席兼行政總裁，只係做非執董，仲有冇返公司？佢就話「有，有！」不過，當問到有冇同屋企人飲茶，佢就只係笑笑口，冇回應。