大前晚在長洲失足墮海重傷昏迷的秦煌，目前仍在東區醫院深切治療部（ICU）留醫，李家聲昨日到醫院探望後表示，秦煌情況好到出乎意料，既毋須插喉，坐在床上頭腦清醒還兩眼精靈，更識得講笑，且揚言要三日後出院，秦煌康復神速，確實令人鬆一口氣。
現年60歲的秦煌大前晚在長洲墮海後，因頭部撞向木樁導致重傷昏迷，一度情況危殆。及至前日中午，秦煌終於蘇醒，但有肺積水及胃炎，要一直插着喉。不過昨日他的情況已大大好轉。
事發當日跟秦煌一起到長洲消遣的李家聲，昨日下午5時許到醫院ICU，他逗留了約10分鐘便離開，問到秦煌現況如何時，家聲說：「佢冇乜嘢啦，今日情況好好，自己估唔到狀況咁好，仲識講笑，頭腦好清醒，秦煌仲話三日後一定要出院㖭，佢叫我通知啲同事唔好嚟，話費事出院後要請佢哋食飯。」
累人墮海感抱歉
李家聲指秦煌不大記得當日事發經過，至於究竟事前是否飲醉酒？李家聲沒好氣地說：「我講咗8次佢唔係醉酒，如果真係飲醉就唔係一個扶佢，至少有4、5個人扶啦，佢係落船時叉錯腳啫。」至於當日同行另一郭姓友人因被秦煌扯落水受傷，目前仍在瑪麗醫院留醫，幸情況沒有大礙，家聲也有將友人受傷一事告訴秦煌，未知秦煌聞訊後心情如何？李家聲說：「覺得唔好意思，不過佢仲講笑問係咪嗰個人推佢落水，又話自己三日後可以出嚟，叫大家唔使擔心，秦煌好有責任感。」
勸減肥不勸戒酒
李家聲談及秦煌清醒後狀況時又說：「一入去（ICU）就見佢坐喺度瞇埋眼，我行去望佢，點知佢突然撐大眼望我，噚日見佢仲係大細眼，今日就兩隻眼撐大，佢話三日後出院，應該唔會，我諗五日左右啦。如果冇乜大礙就會轉去普通病房。」
無綫甘草演員江漢昨日也有到醫院探望，他離開時透露秦煌坐在床上跟他傾偈，大讚對方狀況很好，問江漢會否勸秦煌戒酒時，他說：「咁又冇，我自己都飲，不過就有勸佢減肥囉。佢對眼好精靈，話一出院就返工㖭。」
採訪、攝影：王崇穎、卓寶花