上太空係好多小朋友嘅夢想，美國萬通每年都會選出10位小朋友做小太空人，去美國接受太空人模擬訓練。呢個計劃今年第十屆，聽主辦單位講，報名人數係最多嘅一年，有成2000個小朋友爭10個名額，噚日佢哋選出新一屆小太空人。
做得準「太空人」梗有番咁上下，雖然佢哋只係8至11歲，但逐個企喺台上講入選感受，一啲都冇怯場。
最細嘅小太空人張睿言（Alvin）得8歲，佢大家姐同二家姐都分別喺06同07年做過小太空人，可以話係「一門三傑」。Alvin話見兩個家姐做小太空人好大壓力，尤其二家姐比賽期間有盲腸炎，喺醫院見佢「臉青青」，但第二日照去參加第二輪複選，覺得「佢哋好勇敢，自己亦好榮幸。」呢班小太空人會喺8月到美國太空總署，接受小太空人模擬訓練。