上市公司栽培第二代，陸續安排後輩到公司學嘢，景福集團（280）上個禮拜五發通告，委任楊嘉成為公司非執行董事，即日生效。楊嘉成係景福執行董事楊秉剛個仔，亦係主席楊秉樑（圖）個姪。
楊嘉成今年先26歲，喺加拿大維多利亞大學政治學學士畢業，雖然佢修讀嘅科目唔係經濟呢幾瓣，又唔係好多人讀嘅工商管理，但亦無阻佢返家族生意幫手嘅興趣。
據通告內容，家吓楊嘉成雖然獲景福委任為非執董，但佢冇同公司簽訂任何服務合約，亦冇指定委任年期，非執董嘅酬金都要按每個財政年度結束後，由公司薪酬委員會按市場而釐定。
咁睇嚟楊嘉成要攞到酬金，都要有一番作為，得到公司薪酬委員會認同先𢭃到人工，始終呢個世界力不到不為財，主席親戚都咁話。