民主黨副主席狄志遠95年放棄連任立法局議員後，退役咗足足13年後終於復出，噚日宣佈參加今屆嘅社福界功能組別選舉。佢話退役期間積極操練，讀碩士、又喺唔同機構做嘢，再上戰場信心十足。
佢原本嘅參選口號係「yes,wecan」，後尾發現同奧巴馬撞口號，嚇一跳之餘就刪咗個「yes」。阿Dick話會用新模式參選，包括會企街派單張，唔止淨係向小圈子選民拉票。
阿Dick未來對手張國柱，原來兩人已經飲過茶，約定嚟一次君子之爭。好多人都覺得張國柱業界利益行先，但阿Dick重申社會弱勢社群都好重要，呢個可能係佢哋最大嘅分別。雖然拒評勝算，但身為社工嘅太太Jenny表明全力支持，呢一票已經好重要。