無綫處境劇《同事三分親》圓滿結束之後，緊接播映另一個處境劇集，並會選用《同》劇原班人馬。無綫製作總監曾勵珍昨日表示新劇會加入鄭欣宜和吳君麗，並安排了一個充滿好奇心、活潑爽朗的角色給欣宜演出。
處境劇《同事三分親》將於下月七日奧運前夕播映第364集大結局，下一套處境劇會在今年9月開拍，並會選用《同》劇原班人馬，包括江欣燕、徐榮、王祖藍、郭少芸及劇中「形」一班同事，還會加入一些新的人物。
「要練好中文」
昨日無綫製作部戲劇製作總監曾勵珍表示，新處境劇預計會拍260集，她說：「欣宜同吳君麗都會加入，吳君麗係做欣宜嘅姨媽，入面角色都係啱番欣宜，做個好奇、活活潑潑嘅後生女。欣宜都好渴望快啲開工，𠵱家佢話要練好中文，我上次見到佢，佢都進步咗好多。」
另外，昨日親自拍攝《同》劇大結局的監製羅鎮岳則表示，新處境劇的背景是一間名為「潮」的雜誌社，內容圍繞辦公室糾紛及家庭故事。
江欣燕嫁裘俊
對於最近吳鎮宇表示當年無綫有新晉女演員向他哭訴拍劇靠關係，曾勵珍說：「我嗰時都成日用佢（吳鎮宇），我同佢都冇乜關係，我成日覺得有實力嘅演員唔使靠關係，我諗佢諗得太多，諗歪咗！」問曾勵珍該名哭訴的女演員是否胡杏兒？她說：「大家唔好估，越估會越多其他揣測。」
《同》劇昨日全體演員齊集將軍澳電視廣播城拍攝煞科結婚戲，講述江欣燕及飾演裘俊的徐榮結婚，對於女主角關詠荷未能拍攝大結局，江欣燕說：「冇覺得可惜，只係唔捨得，劇入面都有交代叫Vincent（黃子雄飾）去外國同關詠荷結婚同生埋仔，唔緊要，第日私下會約佢食飯。」
採訪：楊潔雯
攝影：陳俊強
