諗頭多多嘅公民黨，噚日搞誓師大會都特別多搞作。例如上屆參選會計界時，被指外形似師奶嘅譚香文，噚日就以「專業才能，C9精神」為競選口號，自嘲之餘，亦突出佢為市民格價，同埋喺立法會帳委會幫市民睇實政府盤數嘅強項。由社福界改為出戰新界西直選嘅張超雄，噚日就被黨友封為「鬍鬚俠」，競選口號好搞鬼，叫「為公道，死Lur！」。
狂背港島區街道名
有演開舞台劇嘅「公民黨周迅」陳淑莊，噚日就同黨魁余若薇及參選拍檔容詠嫦，一面抬住個「道」字，一面狂背港島區嘅街道名，充份展示佢對港島區嘅熟悉程度。即將出選工程界嘅黎廣德就帶齊道具，一邊揸住頂工程師帽，一邊爬上條鐵梯，演繹自己句競選口號：「工程師，企高啲」，話工程界立法會議員，好應該提升界內同整個香港嘅地位喎。
前日喺一個選舉論壇上，大勝民建聯李慧琼同鼠王芬嘅毛孟靜，噚日就以「真的在乎」為競選口號。佢話，雖然呢句口號可能文藝腔咗啲，但就反映佢真係好在乎市民嘅感受。