工聯會三子早前喺審議種族歧視條例時，冇投票支持政府提出嘅豁免語言歧視修訂條文，結果震怒特區政府。福祿壽三寶俾政府「哦」唔係新聞，八方聽聞事件仲驚動到會長鄭耀棠，原來棠哥亦捉住三位議員訓示咗一輪，話就算係要為選舉、怕投票支持政府會失分，都淨係可以留番要選嘅王國興喺度，其他兩位包括嫻姐同鄺大狀玩失蹤就得啦，使乜玩到咁大鑊喎。
八方相信棠哥出聲嘅原因之一，除咗因為曾班子對此唔高興，其實都有諗過自身問題，事關工聯會都搞好多興趣班同活動；有關條例生效之後，佢哋若果冇特別為少數族裔人士提供配套，稍一不慎亦會犯咗歧視行為，俾人告埋一份。