現時海關只有九名人員專責跟進及調查呃秤案件，隨着舉報個案上升，海關須加強巡查，調查人員的工作量及壓力大增。有調查人員坦言，除遭商販當街指罵外，平日下班避去曾執法的街市，以免遇上不必要的麻煩。
下班後避去問題街市
參與調查呃秤的海關署理消費者保障組高級貿易管制主任郭翠華表示，為加強打擊呃秤，該組人員會「放蛇」調查：「我哋會以不同組合，例如扮夫婦假裝買嘢，但就唔會有乜嘢特別打扮，只係好似一個普通人咁。」
郭坦言，曾遇過不少被懷疑呃秤的商販當街發難指罵，「俾人咁當街鬧，當然唔好受，但我哋仍需耐心咁叫佢哋冷靜。」她不諱言，平日下班會盡量避免去曾經執法的問題街市，「避免尷尬同不必要嘅麻煩，就算屋企附近嘅街市，我都盡量唔去，寧願兜路去其他街市買餸。」
雖然調查呃秤需經常到又濕又滑的街市工作，但郭也樂在其中，「可以唔使經常留喺辦公室咁悶，工作比較多元化。」
本報記者
部份呃秤黑點
地區：港島
黑點：灣仔鵝頸橋街市
地區：九龍
黑點：旺角奶路臣街街市、旺角花園街街市、觀塘瑞和街街市
地區：新界
黑點：荃灣楊屋道街市、屯門新墟街市
資料來源：香港海關