多次演活金庸筆下老頑童周伯通角色的無綫資深藝人秦煌，前晚在長洲乘渡輪時意外失足墮海，頭部撞向木樁導致重傷昏迷，被送往東區醫院深切治療部急救，情況一度危殆。其好友李家聲昨日到醫院探望秦煌後，指他已經蘇醒並度過危險期，跟他說話時會點頭並郁動手指作回應，但因目前仍有肺積水及輕微胃炎，故要繼續留醫ICU觀察。
現年60歲的無綫資深藝員秦煌（原名梁日成），前晚與李家聲等友人到長洲消遣後，全身酒氣的他在乘渡輪返回市區期間，於渡輪與碼頭之間的踏板上失足墮海，頭部撞向木樁重傷昏迷，由直升機送往東區醫院急救，情況一度危殆，留醫深切治療部（ICU）。昨日上午約9時，秦煌被醫護人員推離ICU到另一部門檢查，只見他雙目緊閉，額頭有明顯傷痕，戴上口罩及插着喉，約20分鐘後他再被推回ICU，不過李家聲昨日探望秦煌後，指他中午時分已經清醒並度過危險期。
情況穩定
「佢有點頭郁吓手指」
昨日下午約3時半，雙眼通紅的李家聲到醫院探望秦煌，他表示一名姓郭友人於意外期間被秦煌扯跌，撞碎面骨，現正於瑪麗醫院留院，他昨日下午便是由瑪麗醫院趕過來的。李家聲在醫院逗留近兩小時後離開，問到秦煌的健康狀況時，他說：「佢一點幾鐘已經醒咗，情況並唔嚴重，係有啲肺積水。我話畀佢知有好多朋友問候佢，佢都有點頭，郁吓手指，佢係清醒，只不過插住喉講唔到啫。佢本來拍緊《王老虎搶親》，監製叫我轉告佢知唔使擔心通告，佢都有點頭有反應。」
據知秦煌上船前曾經飲醉酒，但李家聲否認說：「唔係，如果佢好醉，起碼有四、五個人扶佢啦！因為有朋友由深圳嚟，所以我哋約埋聚餐。」之後李家聲接受電話訪問時說：「佢醒番已經過咗危險期，個胃有小小發炎，同埋個肺可能有啲水，所以要繼續留喺ICU觀察。」
秦煌的家人則於昨日下午時分到醫院探望，問到其狀況時，秦煌女兒說：「冇乜嘢，有心啦！佢醒咗啦，多謝大家關心。」至於秦煌太太莫佩雯昨日在電話中指他沒有大礙，她說：「冇乜事，多謝關心，今日幾十萬個電話打嚟，好似我等緊做另一件唔開心嘅事咁，我自己聽到都唔開心啦。」
無綫藝員劉江昨日也有到醫院探望秦煌，在ICU逗留約15分鐘便離開，他說：「佢比想像中好，張大眼，知道我嚟咗，之前睇報紙真係嚇死。」無綫外事部副總監曾醒明昨日在電話中說：「件事喺深夜發生，樂小姐（無綫高層樂易玲）知道咗即刻去醫院了解。當時秦煌仲喺ICU，今朝早都派咗兩個藝員科同事探佢，醫生話佢情況穩定，屋企人同醫生嗌佢有反應，檢查咗冇生命危險。至於佢最近拍緊嘅新劇《王老虎搶親》，監製會作出適當調配，跳拍佢嘅部份。」
拍檔憂心
「等佢返呢個大家庭」
此外，蘇玉華、李國麟及陳鍵鋒昨日在將軍澳電視廣播城拍攝《王老虎搶親》，對於秦煌出事，三人均表現緊張，蘇玉華說：「監製潘嘉德今日都入咗廠講解呢件事，話啲拍攝期會有調動，據我所知影響唔係好大，𠵱家最緊要佢快啲好番，等佢返嚟呢個大家庭開工，佢個角色好搞笑。」
李國麟昨日入廠後第一時間打給李家聲了解，記者見他掛電話時好像鬆了口氣，他說：「之前真係好驚佢有事，但剛剛打過畀李家聲，知佢冇乜事啦！仲可以同家聲傾到偈，等佢搬去普通病房後我先會去探佢，𠵱家唔想騷擾佢住。」
陳鍵鋒則於昨日出外景時，從工作人員口中得知秦煌出意外，他說：「問咗家聲知道情況定落嚟，我先至冇咁擔心，佢咁肥，咁樣跌係幾傷，希望佢吉人天相，快啲好番，等佢住番普通病房時，我哋成班演員都想去探吓佢。」
昨日不少讀者和網民紛紛電郵本報及在網上為秦煌打氣，希望他早日康復。
採訪：林妃、何慧斯
攝影：陳俊強
人物誌：演活老頑童
意外受傷的無綫藝人秦煌，原名梁日成，現年60歲，其肥嘟嘟形象可謂深入民心，其妻為資深廣播人莫佩雯（即《勁草嬌花》的原唱者）。秦煌早年由佳藝電視轉投無綫電視後，至今已服務接近30年，多飾演好人或搞笑角色，過去多年來他曾屢次在佳視及無綫劇集中，扮演金庸筆下的老頑童周伯通，包括76年在佳視及83年在無綫，分別參演劇集《射鵰英雄傳》和《神鵰俠侶》。
娛樂資料庫：飲酒易出事
秦煌失足墮海前曾經喝酒，其實圈中不少藝人均愛好杯中物，而且不時有人因醉酒出事。
林曉培
去年6月在台北無牌醉駕撞死一名女護士，需支付約200萬港元賠償金予死者家屬，另被台灣法院以公共危險罪判入獄50天，過失致死罪判處有期徒刑六個月，緩刑兩年。
梁家輝
02年醉酒駕駛並在紅隧出口撞車，更毆打一名城巴司機，後被罰款及停牌。05年再犯被判入獄兩個月、緩刑三年及罰款和停牌。
鄭中基
00年2月由洛杉磯乘飛機往台北期間醉酒鬧事，毆打機組人員，後被美國FBI拘捕，最後被判罰款及留案底。
米路吉遜
米路吉遜（MelGibson）06年7月在美國加州公路因醉駕超速被捕，被捕期間不斷辱罵猶太人，事後要加入戒酒會、罰款及停牌，並遭猶太人組織譴責，要他發聲明道歉。
資料來源：《蘋果》資料室
全城關懷
林峯：希望佢早日康復
秦煌日前意外失足墮海受傷，很多曾在無綫劇集中與他合作的藝人，知道消息後均表示擔心，並祝福他早日康復。
黃宗澤：我同佢之前合作過，所以聽到呢個消息時心裏面都幾擔心，𠵱家知情況轉好咗個心都好好多，不過佢好番之後真係要注意吓身體，因年紀大啦！
林峯：我頭先下晝先知，同秦煌都熟，平時喺公司見到都成日嘻嘻哈哈，佢一向都健康，相信佢會冇事，希望佢早日康復。
鄭嘉穎：聽到呢個消息好愕然，希望佢快啲好番，冇人想有呢啲意外發生。
鍾嘉欣：我哋合作過《我外母唔係人》，不過冇對手戲，希望佢快啲冇事啦！
葉翠翠：《疑情別戀》有同秦煌合作，不過唔算好多。其實平時食飯我都好鍾意飲酒，但係唔會過火，主要都係想輕鬆同放鬆，但就未試過飲到好大。