上年中資股當炒時，就連韓國股神都出手，不過家陣熊市，乜股神都難免損手，據《每日經濟新聞》報道，一個號稱韓國股神嘅朴炫柱，因為喺港股炒中資股受重創。
轉攻內需股博翻身
報道指港交所（388）披露資料顯示，朴炫柱透過自設公司「未來資產環球投資（香港）」（MiraeAsset）投資港股，上年10月大舉買中資股，包括喺19蚊買入海油服務（2883）、11蚊增持國航（753），5.6至6蚊增持中旅（308），呢三隻股增持後，朴炫柱持股比例都超過5%。
心水清嘅散戶都知，呢啲價位都接近高位，股市一跌，股神仲邊有肉食！所以佢喺3月時決定割肉，6.7蚊及5.2蚊減持國航，中旅跌到3蚊水平亦陸續減持，最後一筆減持價位喺3蚊。
不過，韓國股神轉頭又入貨博翻身，佢5月開始，力攻內需股同基建股，先後喺22.9蚊買入蒙牛（2319），12蚊買中鐵建（1186），上個禮拜五，兩股分別收報23.8及11.7蚊，似係想喺邊度跌低，就喺嗰度起番身。